塞爾特人2連勝着火

加納特由於首戰向熱火嘅昆田李察遜批㬹，故昨日被罰停賽，不過代替「KG」上陣嘅格連戴維斯表現出色，頻頻利用龐大身軀撞散熱火內線，上陣二十九分鐘取得二十三分及八個籃板球，成為贏波功臣，隊友皮雅斯亦大讚格連戴維斯嘅演出：「上季季後賽佢都有好出色嘅表現，我哋好清楚佢嘅能力。」事實上，加納特上季因傷缺席季後賽，喺格連戴維斯擔正上陣嘅比賽，每場平均有15.8分及5.6個籃板球，可見呢位「大舊替工」水準一啲都唔差。

除「Big Baby」之外，塞爾特人射手雷阿倫手風亦超順，三分球九投七中，射入二十五分。熱火今場大敗嘅原因係第二節，當時熱火曾經喺八分鐘之內冇進帳，畀塞爾特人打出一段二十一比○嘅攻勢。熱火連輸兩場後晉級形勢相當險峻，且看第三場回師主場能否收復失地。

侯活冧莊最佳防守球員

另外，NBA昨公布今季常規賽第一個獎項，魔術中鋒杜域侯活以576分，擊敗鷹隊嘅祖斯史密夫（136分）同山貓嘅謝勒華萊士（113分），成功衞冕最佳防守球員！ 本報綜合報道