中環耳目：李張慧美愛朝陽飯莊皇帝菜

李太係美食專家，家族經營西式餐飲到會生意，為咗搵靈感，經常四出試新菜。近日得知主打京菜嘅朝陽飯莊進駐尖沙咀國際廣場（iSQUARE），一於嚟試味。

一坐低，李太柯打一道前菜京糕梨絲，呢味菜以山楂糕加入山楂水攪拌成酸香醬汁，淋在冰涼雪梨絲上，口感清甜無比，恍如一抹夏日涼風。

恭親王燒羊腩香脆可口

戲肉係主菜恭親王燒羊腩，醃料極之考究，加入八角、小胡椒等秘製香料。最考功夫莫過於去油工序，大廚先用刀將羊肉中間嘅肥膏刮走，再用力壓走剩餘脂肪，落鑊炸至可口香脆，不油不膩。

不過論惹味，豆酥桂魚盡領風騷。大廚先將桂魚去骨起肉，放入沸水灼熟，將豆酥加入紅椒炒至香脆然後鋪喺魚上，入口帶少辣但不失魚香。