政情：李慧琼被直資學校嚇怕
審計署報告踢爆直資學校「混帳」事件，全城為之嘩然。九龍西立法會議員李慧琼（Starry），原來諗緊安排讀緊小學三年級嘅女兒日後轉讀直資中學，依家見直資學校良莠不齊，「混帳」程度咁嚴重，都話怕怕，要重新考慮。立法會帳委會負責聆訊審計署報告，Starry都係成員之一，Starry特別有切膚之痛，事關Starry面對公眾係立法會議員，返到屋企就係一位女兒嘅母親，同全港其他家長一樣，要為女兒升學問題煩惱。
Starry話，女兒讀緊嘅小學無一條龍直升機制，佢原本考慮為女兒轉直資學校，一勞永逸，但有啲直資學校明明賺錢，仍然加學費，真係無辦學良心，即係當班學生家長係羊牯啫，令佢對直資學校嘅信心打晒折扣。Starry好感觸咁講，香港中產要供樓，又要交稅，但稍有能力嘅都希望畀兒女最好嘅教育，錢銀無計，諗住直資學校學費貴啲，質素有保證，點知一樣失望！