勞工界今年最大關注議題必定係最低工資，勞工界為咗釐清立場，統一口徑抵禦「外敵」。
俗稱三加六嘅三名勞工界立法會議員同六名勞工顧問委員會勞方代表今年決定唔搞五一遊行，改為喺下個月廿六日舉行勞工界武林大會，廣發武林帖畀全港七百多間工會一齊討論最低工資問題。
三加六喺○五年破天荒首次聯手搞五一遊行，目的為爭取最低工資及最高工時，之後連續搞咗五年，但有成員就話搞咗咁多年都已經無乜新意，所以今年就決定開番個武林大會講吓最低工資問題。
策劃人勞聯副主席李鳳英話，最低工資爭議咁大，加上「張廿蚊」嘅言論，更促使勞工界要坐低傾一傾，到時各個工會一齊探討工資水平、最低工資委員會職能、檢討機制等問題，至於工資水平係咪得廿蚊咁低，英姐就話「公道自在人心啦」，又話今次武林大會係勞工界內部會議，唔會搵官員或者學者嚟加把口討論。