政情：王征亞視總部晒冷
擬入主亞洲電視嘅內地商人王征，繼本月中喺北京高調召開記者會，搵埋五大國企老總同埋一大班全國政協委員撐場，輪到喺香港晒冷。上周六佢以宴請寧波杭州灣訪港團嘅名義，廣邀本港政商界大人物出席晚會，四十幾粒巨星喺大埔工業村亞視總部食君悅酒店到會，排場浩大令人側目。
亞視罕有地主動發布圖文並茂嘅新聞稿，出席晚會嘅除咗寧波市委副書記陳新等一行五人之外，仲有中聯辦人員同全國政協常委，大財團都有代表出席。早前喺京城出面支持王征嘅中國人壽董事長楊超未克前來，特派佢喺美林私人銀行投資部擔任總裁嘅囡囡同埋愛將國壽（海外）副董事長劉廷安去撐場，現場可謂粒粒巨星。
啱啱獲委任亞視執董嘅王征堂弟盛品儒首次公開見客，同堂哥王征儼如亞視新主人，好風騷咁招呼貴賓，不過大家咪忘記，亞視股份買賣被法院禁制咗，王征依家係「義工」啫！咁亞視又點自圓其說呢？新聞稿介紹佢係「特別嘉賓」榮豐控股董事長，問你服未？