政情：博鰲青年論壇搵星爺爆笑彈
由菁英會及亞洲博鰲論壇舉辦嘅「二○一○博鰲青年論壇（香港）」，將於本周五喺會展登場。雖然今年冇國家領導人出席，但相信年輕人一定唔會失望，事關知名藝人「星爺」周星馳，將以比高集團執行董事身份出任主講嘉賓，可以想像到時肯定滿室笑聲。
菁英會一班核心尋日現身記招，百仁基金主席施榮忻以創會會長現身，可見佢對菁英會好有歸屬感。現任主席白富鴻、名譽主席信和集團太子爺黃永光同常務副主席洪為民拍住上，幾兄弟齊心協力唔話得。
白富鴻講起邀請星爺嘅秘辛，原來唔係佢哋幾兄弟嘅面子，而係搭通天地線，利用一層又一層嘅人際網絡，先至成功游說星爺出席。星爺製作咗多齣賣座電影，由佢現身說法講文化產業前景，梗係不作他人想啦！
主講嘉賓粒粒皆星
除咗咁有噱頭嘅星級嘉賓之外，主講者仲有中港政商界名人，包括金管局總裁陳德霖、外交部副部長張志軍、中投公司監事長金立群等。今次主題係《復甦中亞洲發展的機遇和挑戰》，探討後危機時代嘅亞洲金融、文化產業同經濟發展等，啱晒想知香港何去何從嘅後生仔聆聽。