財政預算案出台後，個個都大鬧財政司司長鬍鬚曾曾俊華，話佢嘅政策唔湯唔水，有等於冇。面對呢啲批評，正常人都會好好檢討吓，不過鬍鬚曾睇嚟真係唔想跟主流，因為佢到呢一刻都認為，市民對預算案嘅反應正面，好似自我催眠一樣。
尋日鬍鬚曾喺電台節目《給香港的信》講呢份預算案，其實都係重播自己嘅錄音帶，叫做簡化咗份足本版就算數。不過佢講講吓，忽然話好開心見到份預算案得到香港市民大眾嘅接受，大家嗰刻當堂激到眼到凸埋，事關無論中產、貧困人士以至中小企，都大鬧預算案樣樣政策都力度不足，又冇具前瞻性嘅措施，鬍鬚曾咁講係咪過分樂觀咗啲？
鬍鬚曾大言不慚，如果唔係自己打咗麻醉針，自我陶醉喺呢個「大家接受」嘅假象入面，就係想呃市民，以為謠言講一百次就成事實。不過市民眼睛係雪亮嘅，如果鬍鬚曾想贏掌聲，唔該就認真做實事啦！