政情：楊家駿春茗爆笑歌舞款客

五黑超猛男登台獻唱

台灣駐港機構第一次嘗試春茗唔食飯，請各界好友喺理工大學賽馬會綜藝館欣賞表演。楊家駿老婆同兩位公子都嚟打氣，老工業家蔣震伉儷、亞洲電視聯合財務董事總經理長原彰弘一家亦都前來捧場。初時台下賓客正襟危坐，表現有啲拘謹，可能大家都有啲唔慣。

節目進行到夜晚十時過後，楊家駿、台北貿易中心董事總經理劉錫威等五名猛男，出乎意料地以黑超look登台獻唱經典台語歌「山頂的黑狗兄」，佢哋左手揸咪，右手不停畫圈揮舞，腳踏輕快舞步，現場觀眾爆笑叫囂，encore聲不斷。可惜佢哋只準備呢一首歌，想獻唱多首都冇。散場後好多人流連回味，有人叫佢哋索性組樂團出唱片！