政情：葉劉facebook嚴禁粗口
潮流興網上溝通，不過煲呔曾政府一路都將網民當成毒蛇猛獸，藉口係網民講嘢有時過激，當局控制唔到。要做到和平互動唔係咁易，有用開facebook同市民傾偈嘅立法會獨立議員葉劉淑儀就話，喺網上粗口來粗口去始終不利溝通，話會刪除有粗口同涉及人身攻擊嘅留言喎。
有網民早排喺葉劉嘅facebook上面討論強制收舊樓問題，不過大家嘅言論就愈嚟愈偏激，漸漸就開始唔係討論件事，變咗互相攻擊，葉劉覺得有啲粗口太過侮辱女性，所以就刪咗相關嘅留言，但又引起另一批人不滿，葉劉惟有喺facebook表明，以後一見有人講粗口就刪。
雖然葉劉話用得互聯網就預咗有咁嘅事發生，不過都認為唔可以繼續縱容。
佢認為今次咁做唔算係打擊言論自由，不過就希望網民以後可以自律啲。無論葉劉禁粗口係咪得到網民嘅支持，點都好過政府斬腳趾避沙蟲啦！