喺民記嘅檔口前，有反民建聯嘅兩三個青年着住「禮義廉」T-shirt踩場，警方即時神經過敏加派十幾廿個軍裝加便衣重重圍住個檔口，離開時更手拉手圍成兩圈護送鬍鬚曾上車，行花市嘅市民見到如此陣仗忍唔住揶揄：「佢驚畀人標參呀？」

警察護航

放大圖片

其實話嗰幾個青年去踩場嘅講法係太誇張，因為佢哋只係着住高登網民設計，印有民記嘜頭兼「禮義廉」三個字嘅T-shirt喺檔攤前眼望望，其中一位徐姓青年話約咗Facebook網友今日三點嚟呢度搵民建聯主席譚耀宗寫揮春，所以佢先早一日去視察環境。

檔主高喊「財爺放水」

佢哋點都諗唔到，喺度遇上鬍鬚曾嚟撐場，幾個青年出現無幾耐忽然湧現大批警察，民建聯檔攤前行人路即時擠得水洩不通。呢個時候，對面賣吹氣公仔檔攤嘅東主原本一邊睇熱鬧，一邊攞住佢哋嘅得意貨品，高喊「財爺放水，豬籠入水」，點知在場食環署職員叫佢收番放喺行人路上嘅紙箱，搞到佢鬼咁無癮話：「佢哋阻住，要我哋讓路，有冇搞錯？」由此可見，鬍鬚曾行一轉花市除咗浪費警力之外，仲好擾民。

當鬍鬚曾搞完一場大龍鳳後，即時急腳走人，不過佢架車停喺年宵市場盡頭，而警方則圍成兩圈，務求滴水不漏護送鬍鬚曾上車，行緊花市嘅市民見此陣仗莫不嘖嘖稱奇。記者沿路跟住鬍鬚曾追問預算案草擬成點，又有市民難得見到財爺，主動走上前向鬍鬚曾獻計，話自己有兩條好橋，睇吓鬍鬚曾肯唔肯納入預算案，不過一向強調會聽取民意制訂預算案嘅鬍鬚曾，無論係記者定市民嘅問題都照樣笑而不答，好似當年宵市場係一個好危險嘅地方，只想盡快離開。