【本報綜合報道】經歷低迷一月後，「飛人」卡特終於用表現挽回球迷信心，尋日佢面對新奧爾良黃蜂轟入48分，創今季個人新高，並協助奧蘭多魔術反勝對手123比117，「飛人」終於再度起飛。另外，波特蘭拓荒者後衞萊爾證實因傷退出明星賽，NBA已補選洛杉磯快艇中鋒卡文，佢將會首度征戰明星賽。

「飛人」卡特上月表現不堪入目，整個一月嘅投射命中率僅得28%，難怪魔術球迷上月不斷向「飛人」報以噓聲，擺明唔滿意佢嘅表現。幸好霉運已經過去，卡特尋日就作出大爆發，全場27射19中攻入48分及取得7次助攻，與杜域侯活一同於下半場發威，令一度落後17分之魔術成功反彈，贏123比117。

「飛人」揚言低潮已過

卡特賽後表示：「現在已經係新一個月，過去就讓它過去吧！我知道球迷對我有期望，我亦唔介意聽到噓聲，今晚感覺很棒，我會繼續努力打好比賽。」其實卡特今晚只要多入3分，就可以平個人生涯最高得分紀錄51分；至於隊友杜域侯活亦表現出色，為魔術貢獻25分及12個籃板，表現大勝對方中鋒奧卡科，後者今場捧蛋。

而NBA尋日公布快艇中鋒卡文，將會代替受傷嘅萊爾出戰明星賽。卡文今季平均獲得20.2分及9個籃板，表現突飛猛進，而今次亦係佢登陸NBA七季以嚟首度入選明星賽；而補選呼聲甚高嘅布魯克斯就再一次無緣賽事。