美國著名時裝設計師Tommy Hilfiger有筍盤放！佢打算放售名下位於紐約曼哈頓The Plaza嘅一個頂層複式豪宅單位，開出天價8,000萬美元。
雖然價錢一啲都唔筍，但單位質素又真係幾高。首先，The Plaza係紐約其中一座地標，樓齡106年，屬於戰前建築物，相當具代表性，而且呢個6,000方呎嘅四房單位，唔單止望正紐約中央公園嘅靚景，仲有一個私人大露台、樓高35呎穹形屋頂，算得上曼哈頓豪宅中嘅稀有優質盤。
至於裝修呢，Hilfiger乃殿堂級設計師，單位自然有好多價值不菲嘅藝術品擺設。好可惜，佢會將大部分嘅擺設分開賣，唔會連裝修放盤。
Hilfiger可以話係非常心雄嘅業主，叫價比起五年前嘅買入價升逾2倍，而對上一次The Plaza嘅高價成交只係4,800萬美元，就算係曼哈頓同類型單位，成交價中位數亦都只係4,100萬美元。
Hilfiger○八年七月以2,550萬美元購入單位，兩個月後曾經開價5,000萬美元放盤，但撞正金融海嘯放唔成。Hilfiger見依家多數留喺康涅狄格州嘅大屋，遷就仔女返學，索性將層樓放售。
余詩韻