政府禁毒廣告話「不可一，不可再」，喺康宏理財（01019）主席王利民（Quincy）眼中，仲有一樣嘢係唔可以做嘅，就係食魚翅！呢位搞作多多嘅公司主席，最近成為咗「一翅都唔食」（I'm FINished with Fins）全民運動嘅護鯊大使，仲喺公司嘅全民大會上簽咗企業承諾書，代表集團向公眾承諾停止食用魚翅。
咪以為佢係得個「講」字呀，原來Quincy已經三年冇食魚翅喇，佢話喺同事嘅婚宴上，會表明自己唔食魚翅；喺公司嘅應酬中，都盡量避免食有魚翅嘅菜式咁話喎。為咗隆重其事，康宏制訂咗一系列「無翅公務飲宴守則」，鼓勵員工關注保育鯊魚議題，原來魚翅已經喺公司嘅餐單上絕迹。
「一翅都唔食」全民運動已經有超過130名本地名人踴躍支持，又係嘅，冇理由將自己嘅快樂，建築喺鯊魚嘅痛苦身上o架嘛。絲絲都要為環保出一分力，喺度宣布：「我從此唔食翅喇！」
余詩韻