絲絲講場：稻香太子閉關練煮麵
拉麵店開到一街都係，可想而知競爭幾咁激烈，稻香（00573）偏向虎山行，仲由太子爺鍾震峰（Terry）擔大旗，話晒係佢第一個Project，真係唔敢怠慢，為咗搞好呢檔新業務，佢話已經好多個月冇假放，成日都匿喺舖頭煮麵喎！
回巢搞大RingerHut
稻香引入嘅日本麵店RingerHut今個月已經開業，Terry邀請絲絲試麵。過去幾年喺連鎖快餐店「偷師」嘅Terry話，今年一月先返番嚟稻香幫手，好畀心機搞。
除咗落力學煮靚麵之外，佢仲好落力去Sell間麵店，RingerHut呢個品牌喺日本已經有50幾年歷史，有超過500間舖頭。
目標每日賣六百碗
佢話隨住依家香港人愈來愈重視健康飲食，覺得係時候引入呢種多菜少肉嘅長崎Champon日本麵嚟香港，而且價錢相當街坊價，所以相信會吸引到年輕人。講到有咩目標，佢就笑笑口話每日賣600碗麵喎，依家已經做到每日超過6轉客，相信好快就達標喇。
講到稻香原有嘅中式酒樓生意，行政總裁梁耀進就話，下半年整體同店銷售情況有改善，不過仍然係下跌，所以明年有機會加價2至3%。
余詩韻