政情：勁抄星洲 港官捐薪吸嬲嬲
新冠肺炎疫情持續超過半年，至今仲未結束。有數據分析公司尋日發表調查報告，列出市民喺疫情期間嘅種種表現，結果顯示網民表達「憤怒」嘅次數一直較高，最嬲就係早前政府捐人工，質疑政府處理疫情嘅手段，係向新加坡「抄橋」喎！
銅芯口罩「錯失時機」
疫情期間市民嘅情緒起伏好大，數據發現網民「憤怒」情緒遠超「開心」或「悲傷」喎。團隊分析市民憤怒嘅原因有兩個，分別係新加坡政府宣布減薪以共度時艱，而港府嘅政治任命官員就淨係捐出一個月薪金，況且捐出金額太少、質疑港府向新加坡「抄橋」同埋認為港府官員冇減薪咁啦。
調查仲顯示市民關心口罩嘅高峰期係一至二月，而政府喺五月先派發「銅芯口罩」係屬於「錯失時機」。但報告「有彈有讚」嘅，話疫情記者會可以令市民掌握疫情現況，所以反應普遍較佳，而主持記者會嘅衞生防護中心傳染病處主任張竹君仲成為最受歡迎嘅公職人員添！