政情：區議員未上任 已謀拆中聯辦花槽
民主派過往多次提出要拆走中聯辦外嘅花槽，聲稱個花槽造成阻礙。雖然新一屆中西區區議會下月二日先開會，但當區多名候任區議員已揚言會倡議拆除中聯辦外嘅花槽，話拆花槽可以擴闊行人路面，讓市民使用喎。
中西區區議會石塘咀選區候任區議員葉錦龍等多名無黨派嘅中西區候任區議員，尋日就開記者會，期間葉就話曾經收過街坊意見，指希望可擴闊中聯辦外行人路，唔止可以畀市民使用，亦可以讓記者採訪示威時有多啲空間。
民主派7年前已動議
不過翻查資料，本身都係中西區區議員嘅立法會議員許智峯等多名民主派區議員，早於二○一二年已喺區議會上動議拆除中聯辦外花槽，但最終喺多名建制派區議員反對下遭否決。新一屆中西區區議會民主派取得主導權，睇怕個花槽都未必保得住。
此外，政府提出明日大嶼填海計劃時曾提過以隧道連接人工島同堅尼地城。中西區觀龍選區候任區議員梁晃維就話，擔心會對區內交通造成負荷，形成擠塞，所以會反對有關計劃咁話。