政情：油尖旺區會棄粵劇搞cosplay 長者冇癮
以前區議會一般嘅文娛活動都係搞吓粵曲欣賞、國術表演等，依家由班後生揸莊嘅油尖旺區議會就覺得呢啲活動太老餅喇，想搞番啲符合年輕人口味嘅文娛活動，該區區議員林兆彬（阿Ben）日前就喺Facebook出貼，話油尖旺區議會文化藝術活動統籌委員會決定預留約二十八萬元，舉辦「動漫及cosplay」相關主題嘅活動，唔通呢啲就係風水輪流轉？
老實講，區議會搞「動漫及cosplay」活動都係第一次，而統籌委員會委員之一嘅阿Ben都係咁講，話無記錯呢個活動應該係全港區會嘅第一個cosplay活動。佢哋有呢個諗法，都係因為歷屆區會啲活動太悶喇，大多都係老人家鍾意嘅粵劇或懷舊金曲表演，唔太符合年輕人口味。
28萬舉辦兩日
咁啱呢屆區會以後生仔居多，而阿Ben又好鍾意動漫，所以先決定搞呢個活動。之但係，依家後生仔就有得玩啦，但輪到班老人家悶呢，真係順得哥情失嫂意。另外，阿Ben話初步構思個活動大概係一連舉辦兩日，計番條數咪十四萬元一日！唔知當區居民覺得值唔值呢？
