政情：周偉雄唔知驚 趕開會又違泊
葵青區區議員周偉雄曾多次被市民發現違例泊車，因此有人提議佢改名做「周違泊」，點知佢都係唔知驚，尋日又重蹈覆轍，再次被揭發違泊。佢接獲查詢時就直認不諱，仲話已經被警方抄牌添。
爆料有區議員亦被抄牌
有讀者尋日朝早發現周嘅私家車停泊咗喺葵興政府合署附近位置，而嗰個位置並唔係一個合法泊車嘅地點。問番周偉雄，佢承認違泊，因為十點要開會，但就遲咗，所以泊完車就即刻趕上去，事後已經被抄牌喇。佢仲爆料話有另外一名區議員都被抄牌添，但佢話都預咗，食得鹹魚抵得渴喎。
其實佢都唔係第一次被發現違泊，開會遲到亦唔係第一次用嘅藉口，如果有朝一日區議會討論區內違泊問題，唔知佢又會點講呢？