新一屆區議會明年一月履新，民主派奪取大部分議席，其中贏取逾九十席嘅民主黨（白鴿黨）早前已傳出喺多個區議會出現自己友爭櫈仔嘅情況。據悉該黨將會包攬多個區議會主席之位，其中包括南區同中西區，而該黨喺中西區區議會仲會獨攬正、副主席之位。唔知該黨最後喺全港會霸幾多個正、副主席位喇。
據我哋所知，喺區議會選舉順利連任嘅白鴿黨中西區區議員鄭麗琼，同埋同樣喺今屆當選中西區區議員嘅該黨楊浩然將會出任中西區區議會正、副主席。而該黨副主席羅健熙就會出任南區區議會主席。
另有傳該黨嘅黃偉賢及蕭亮聲，亦將分別出任元朗區區議會同九龍城區議會嘅主席。
鄭麗琼話，民主派同新當選嘅政治素人傾過，一班素人都好尊重佢哋，而且素人當中有部分仲讀緊書，亦有人希望第一年任期可以有多啲時間熟習議會，所以區議會正、副主席好大機會會畀番白鴿黨議員去做。而羅健熙回覆時就解釋，民主派對區議會主席人選已有共識，自己將擔任主席首兩年任期，而南區另一區議員司馬文則出任副主席一職，任期同為兩年。至於之後兩年嘅任期，就到時先至再決定人選喇。