政情：垃圾徵費料難產議員嚴斥 黃錦星白𢭃人工唔開會

冇解決疑慮 齋叫人信佢

其實垃圾徵費提倡「污者自負」，明明係好事，點解冇議員支持呢？陳克勤都承認垃圾徵費本身係「好好嘅政策」，但講到落實嘅時候，其可行性就備受質疑，無論建制抑或泛民、各大環保團體都對政府解說表示失望。陳話垃圾徵費傾咗好幾年，依家「臨門一腳」搞唔掂，政府要負好大責任，仲點名批評黃錦星係「離地局長」，成日冇具體措施之餘，仲要係咁叫啲議員「信佢（黃錦星）」。

陳克勤鬧爆黃錦星唔聽議員嘅意見，完全係「長官意志」，批評黃淨係話相信政策實行初期只係出現「陣痛」，過一段時間就冇事，永遠唔諗辦法解決問題囉。陳話議員曾經向政府建議推出多啲獎勵措施，等市民可以積極參與，但黃就多次重申會設置膠樽回收機就算數，根本冇其他建議。另外，唔少議員擔心垃圾徵費會引致非法棄置嘅問題，曾經問黃點樣確保三無大廈、鄉郊嘅執法工作。黃就回應話會加強宣傳教育，又重提「陣痛言論」同埋「信我！」但其實根本冇解決議員嘅疑慮。

咁垃圾徵費嘅未來路向應該點呢？陳就話如果政府想重新推行，下屆立法會一定要解決議員嘅疑慮，否則死結依然喺度。陳又話黃錦星喺本屆會期得一項工作，就係推行垃圾徵費，但黃多次唔去立法會開會，交晒畀副局長，簡直係「白支人工」呀！

何俊賢要求討論中止草案

而議員何俊賢（高佬賢）尋日就去信相關法案委員會，要求討論是否繼續審議垃圾徵費草案。被問到係咪想中止委員會工作時，高佬賢就矢口否認，形容今次去信只係一個中性嘅提醒，但又話自己唔介意做醜人，仲話計過條數，今屆會期難以完成審議。佢又話即使委員決定繼續審議工作，都希望佢哋不妨調整心態，又話有啲議員唔一定會連任，若果議員對條例咁有意見，不如就畀機會大家作「臨別感言」啦。