政情：大埔區會否決龍舟賽撥款 民政署擬再檢視惹爭議
大埔區議會早前否決大埔體育會三項撥款申請，包括涉及最大金額嘅一百萬元大埔區龍舟競賽，但點知日前民政事務總署突然去信大埔區議員，話香港受社會事件同疫情影響，好需要呢啲活動團結各界，仲話唔排除會重新檢視有關嘅撥款申請決定喎，搞到一班區議員完全摸不着頭腦。
指需要活動助團結各界
大埔區議會副主席劉勇威就話，一月底因為疫情同撥款指引唔清晰嘅緣故，區議會否決咗三項關乎體育項目嘅撥款申請，希望等四月底撥款指引工作小組開會後再做決定，但依家民政事務總署又貿貿然話要重新檢視，鬧爆話民選議員嘅決定否決咗都可以推翻，完全粗暴干預，離晒大譜，仲叫署長慳啲，唔好再寄啲垃圾信件咁話！
其實最近政府被批評以抗疫為名借機削減區議會撥款，已經鬧得沸沸揚揚，依家疫情未過，民政事務總署又無啦啦拎六月嘅端午節龍舟賽嚟講，其實疫情發展如何，至今都係未知之數，署方點解要係呢個時候無事搵事做，再挑起爭端？