政情：嘗古樹普洱 邱少雄體會慢活
雖然學校仍處於停課期間，但教職員並冇因此而清閒。新界校長會主席邱少雄，尋日下晝到善德基金會同主席董吳玲玲洽談公事，得到董太以珍藏嘅古樹普洱茶款待，仲話疫情當下，飲普洱茶對身體嘅好處多不勝數。邱校長試過之後，就感到若非放慢生活步伐，就難以感受上等茶葉嘅層次同韻味。
酒樓貨色無得比
邱少雄話自己同大多數港人一樣，日常工作都好繁忙，然而行事匆匆嘅後果，就係好容易忽略事物嘅內涵或精髓，做人唔想流於表面，就真係要將節奏放緩，撇除囫圇吞棗嘅態度去品茗，先至體會到佢杯中嘅普洱茶，的確同酒樓貨色有好大分別。所以慢活文化，的確值得提倡，但礙於公開試臨近，邱校長話目前要抽時間做好預備工作，畀考生有一個安全嘅環境下考試咁話。