政情：商戶叫苦連天 邵家輝：放假出街消費撐港

見佢喺商場行嚟行去，喺超市同餅舖左望右望，又停吓睇電話，睇完又繼續行，行到一間酒店大堂索性坐低慢慢睇，我哋上前同佢打招呼，問佢睇乜嘢睇到咁入神，佢話咪睇緊邊度封路同埋示威訊息，因為約咗人食飯未到時間咪望吓囉，啲資訊四方八面咁send過嚟，唔睇又唔得，因為自己做呢行，一定要掌握最新訊息。

投入家庭樂 平衡唔開心

咁睇得多呢啲報道有冇負面情緒？佢話唔多唔少都會有影響，愛香港嘅人一定會唔開心見到呢啲事發生，睇吓依家各行各業，呢段時間捱得幾辛苦。問佢放假嘅時候會唔會出街？佢話會，家庭樂嘅時候會全情投入，將時間放晒喺家人身上，惟有咁樣先可以平衡番一啲唔開心情緒，同埋盡量多啲出去行街消費用行動撐香港。