政情：梁繼昌拋磚引玉 叫會計師公會搞普選

其實Kenneth所講嘅普選係為其所屬功能界別會計界講嘅，為香港會計師公會嘅管治民主化拋磚引玉。佢建議每年周年大會選出新理事會後，就喺三十一日內搞會長選舉，參選人必須為現任當選理事，過去都要做過至少一屆民選理事，而且要有十名會員提名，都有一定門檻要求，至於副會長就建議用內閣制喇。

助增歸屬感 令公會更貼地

Kenneth認為民主選舉可以提升會議參與度同歸屬感，亦令到會長同副會長直接面對會員，長遠可以令公會更貼地喎，希望新一屆理事可以就佢嘅方案去諮詢，或者喺會員大會用決議方式確定喇。連公會搞普選過程都咁繁複，民主果然唔會從天而降。