政情：質問唔夠醫生缺培訓 蔣麗芸窒到徐德義口啞
立法會支援癌症病患者事宜小組委員會尋日召開首次會議，主席蔣麗芸（Ann）一開始問在座四個委員使唔使再選正副主席，大家都無意見，陳凱欣仲舉起交叉手勢，阿Ann唔使一分鐘就連任主席。個會開唔夠半個鐘，就得番佢同另一名建制派女議員，兩個人追住食物及衞生局副局長徐德義同醫管局醫生狂問，問到班醫生口啞啞！
醫管局醫生尷尬苦笑
建制派女議員問醫管局爭幾多個腫瘤科醫生，預計未來需要幾多個醫生，徐德義答佢無相關數字。嗰位女議員就話有無搞錯呀，指政府淨係識做埋啲研究同報告，病人又點等到足夠嘅醫生呢？阿Ann都有問依家究竟係乳房造影設備唔夠，定操作嘅醫護人手唔夠，醫管局聯網服務總監楊諦崗醫生只係答咗句醫生未必夠，佢都未講完，阿Ann就插嘴，打斷佢，仲話：「一早都話你哋唔夠醫生o架啦！又唔引進海外醫生，依家大學都關門，啲人幾時培訓到出嚟啊！」搞到楊只可以好尷尬咁笑嚟回應。
去到最後二十幾分鐘，陳凱欣終於返嚟加入問問題戰團。佢話雖然做完大腸癌手術後存活率高咗，但手術後消耗品使費都貴，政府會唔會有資助？徐德義話現時消耗品並無明確途徑立項資助，但政府都會幫助經濟有困難嘅人士。