- on.cc 東網主頁
- 5月15日 (四)
前日學生同警察喺理工大學大戰，好多人都好擔心，網上亦有唔少圖片、資訊滿天飛，令人好混亂。尋日網上就流傳一張WhatsApp截圖，話理大入面嘅醫療隊全部被捕，仲話係立法會醫學界議員陳沛然（Pierre）講嘅，又話係一手消息，班醫生、護士同急救員全部都被告暴動。Pierre澄清唔係佢講嘅，又話被捕急救員人數同控罪都未明，叫大家唔好亂轉貼消息。
Pierre尋日喺Facebook貼文，話請各位發出文字圖片前，先查證。唔好亂轉貼消息，以免造成混亂同恐慌。佢話曾親身去到警署門口Fact Check，確實有急救員被捕，人數未明，都未知控罪，不過有律師在場。Pierre又教大家Fact Check，佢話Fact Check包括盡量搵一手料、提供可以令人信服嘅人證物證，仲要不恥下問。
為咗令大家分清楚邊啲先係佢發放嘅消息，佢將議員網站放上Facebook，講明佢嘅消息同文字都以呢個議員網站為準，網站入面嘅博客係佢寫嘅，網站都係佢親手製作，而Fb嘅文字都會喺網站博客記錄。至於其他消息包括電話短訊轉載Pierre講乜乜乜，都唔準確。佢又話呢兩日都冇答任何記者嘅問題，因為佢都要時間同空間查證，去Fact Check喎。
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
