中環出更：自小鍾情戲劇藝術 周蕙心最叻做搞手
好多人對藝術好感興趣，仲視為終身事業。卓妮日前去咗喺賽馬會舉行嘅教育劇場計劃，見到香港藝術發展局行政總裁周蕙心，原來佢細細個對藝術已經好有興趣，尤其係戲劇方面添！
點解？佢話細個嘅時候，爸爸會帶佢去睇西方電影，工人會帶佢去睇任劍輝、白雪仙，而媽媽就會帶佢去睇上海粵劇，讀中學時學校好多時都要幫手設計藝術創作，仲講笑話自己搞嘢好叻。搞乜嘢先？佢話係做搞手，因為學校資源有限，所以創作設計都係同一班同學自己去諗同埋統籌，好多時佢就要負責安排人手同設計等等。
陳恆輝：文藝對小朋友好重要
轉頭見到愛麗絲劇場藝術總監陳恆輝，佢話細個嘅時候睇完漫畫同卡通片就喺屋企行嚟行去，構思吓將唔同劇集嘅人物抽出嚟，組織埋一齊演出另一個故事，而喺讀中學時對演藝同文學好有興趣，中學畢業後考咗入去演藝學院修讀，直言演藝同文學對小朋友好重要，令佢哋知道中國同世界歷史，演藝又有互動性質會容易啲去吸收。
唐睿：細個會買二手書交換睇
同場仲有作家唐睿博士，佢讀開文學創作，話喺細個時已經睇唔同地方嘅文學書籍，慢慢衍生興趣，嗰時對物件好在乎，例如會買啲書籍，聽歌就會買CD，依家就唔同晒，好多嘢喺網上已經搵到。
佢仲話細個因為冇錢好多時都會買啲二手書籍，有時又同啲朋友交換嚟睇，但好多時交換嚟睇之後，唔知邊個借咗邊本書，搞到一套書成日都唔見一兩本，仲話儲吓儲吓書籍就愈嚟愈多，因為屋企地方細所以將啲書放晒喺床度，變相瞓覺嘅位置就愈嚟愈細，每次瞓親覺都係攬住啲書一齊瞓。
卓妮