中環出更：何君堯有樣學樣 提譴責議案獲批
立法會議員何君堯一向係議會中嘅惹火人物，言行同樣出位，繼早前入稟起訴三名泛民議員誹謗，又喺議會中採取行動，喺議會中對其中一名泛民議員提出譴責議案喇！
喺立法會會議議程中已經有兩項針對何君堯嘅譴責議案，分別係基於七月二十一日喺元朗西鐵站嘅事件，以及何曾經喺立法會中形容女議員「食慣洋腸」。不過佢就作出反擊，用番同一招對泛民議員提出譴責議案，就係對住同樣喺七月二十一日喺元朗出現嘅議員林卓廷。
稱林卓廷煽惑群眾非法集會
何君堯認為林行為不檢，煽惑群眾參與非法集會、打鬥或暴動，仲依據影片編製時序表，形容林卓廷有四次挑釁行動。望佢編嘅時序表非常詳盡，列出影片嘅時間同形容埋當刻嘅內容，而且中英對照，就算啲途人講粗口都引述埋，中文就以粗口拼音「DLLM」、「DL」去代表，但英文就原句「Fxxk You」咁寫，單係呢個準備工作已經睇得出佢嘅毅力。
而佢呢份譴責議案獲議員容海恩、姚思榮同潘兆平聯署，亦都已經獲得立法會主席梁君彥批准，載列喺聽日立法會會議嘅議程上。不過，現時會議有大量議程積壓，幾時開始到審議都未知？
卓妮