政情：孫仔停課 侯志強乘機教習武
反修例示威持續超過五個幾月，上個星期示威者仲發起三罷，封埋主要道路，好多市民都返唔到工、返唔到學，教育局宣布停課。小朋友唔使返學梗係開心喇，但家長就好頭痛喇， 都唔知搵邊個湊啲細路好！上水鄉事委員會主席侯志強就選擇教孫仔習武，強身健體咁話喎。
現有4個寶貝孫 遲吓仲再添
小朋友唔使返學，出面又立立亂，出街好難，咪惟有留喺屋企囉！侯志強話可以趁機會教吓孫仔做人嘅道理。有文當然又有武，佢細細個已經開始習武，梗係會教孫仔習武，練吓拳，玩吓詠春咁，等孫仔強身健體添！係（口架），習武唔單止可以保護自己，做多啲運動身體都好啲。佢仲話依家有四個寶貝孫，遲吓仲會添多一個。真係開心呀！