政情：楊釗憶劏房歲月 勉勵青年勿怕捱
香港樓價高企兼萬物騰貴，年輕人向上流嘅壓力好大。中華總商會永遠榮譽會長楊釗話年輕人問題，確係當前香港好大嘅問題，但一切唔可以單靠政府，社會各界都應出錢出力相助。早前佢有份將位於觀塘嘅活化工廈全層單位，以相宜租金支持東華三院成立一個青年共享空間，佢強調「天助自助者」，年輕人都要自己幫自己，先可以捱出頭。
坦言自己「工字出頭」
講到捱世界，白手興家嘅楊釗坦言自己係工字出頭，上世紀六十年代尾做過工人，每日人工只得六蚊，當時佢都住劏房，四個人住，月租八十蚊，即一人二十蚊。佢形容生活非常艱難，後來靠自己捱出嚟。
東華主席王賢誌就話，呢個共享空間以唔高於市值租金一半嘅相宜租金，為年輕創業家提供一個工作環境，目前有超過五成嘅租戶係社會企業。