政情：陳家亮讀醫「行彎路」跟師傅揀沈祖堯棄李國章
試問有邊個唔想做嘢一帆風順？原來真係有！香港中文大學醫學院院長陳家亮尋日出席活動時就話自己鍾意走彎路，大爆當年喺中大讀醫時要揀專科老師，時任外科系主任、現任香港大學校委會主席李國章曾向佢招手，雖然當年唔少同學都爭住跟李學師，但佢就揀咗中大前校長沈祖堯，而當年沈只係畢業就醫約兩年，係部門中最冇實力、最冇權冇勢嘅醫生。
習慣兜路 「輸喺起跑線」
陳解釋，佢揀沈祖堯係因為沈當時年輕、有遠見，覺得可以一齊「闖天下」係好開心嘅事，而佢都相信沈會係有空間畀佢發揮實力嘅老師。陳又話，佢都唔係讀醫先行彎路，細個時家貧，就算考到小學名校，但為咗慳交通費都揀咗屋企附近嘅學校，到考大學時明明已獲歷史悠久嘅港大醫學院錄取，但就揀咗當時新開嘅中大去做「開荒牛」，所以早就習慣兜路，仲話自己係「輸喺起跑線」嘅成功例子。
另外，最近公營醫療服務爆煲，佢就話應該要討論點樣增加海外醫生，亦唔應該將唔識廣東話嘅醫生拒諸門外，因為做麻醉、法醫等醫生唔需要直接同病人溝通喎。