政情：大學立立亂 抽起撥款陸續有來

喺抽起理大嘅撥款申請項目後，外界盛傳建制派議員因近日學生同警方喺校園激戰，示威者又喺大學隔籬嘅主要公路整路障，所以刻意阻礙大學建築嘅撥款，擔心另外兩個大學嘅工程撥款申請都會被卡。

其一係中大嘅項目，申請撥款喺大埔興建一座教學科研綜合大樓，用作設施提升同埋醫學院校區發展，本身已經排咗喺上周五財委會第三項議程，由財經事務及庫務局局長劉怡翔負責，但本周五財委會嘅議程未定，未知到時係咪都會排上議程。另一個係理大圖書館擴建同翻新工程，就排咗喺本周三工務小組委員會第一項議程，由教育局局長楊潤雄負責。唔知政府會唔會最後又臨時抽起呢？

盛傳建制不滿校園失控

有消息人士話，建制派議員認為大學管理不善，感到好不滿，覺得依家啲學生搞到立立亂，又佔據校園，仲要塞晒附近嘅主要公路，而建制派對大學校長有好大怨氣，覺得班校長根本控制唔到啲學生，所以建制派需要多少少時間觀察吓情況，再傾吓先有決定，若然現時要表決相關大學嘅工程撥款，佢哋必定會投反對票。

臨時抽起 避否決重推

財務委員會主席陳健波話明白政府之所以臨時抽起相關申請項目，係因為如果堅決表決撥款，一旦遭否決，到時要重新再將個撥款推上立法會太麻煩。佢話建制派議員可以將三個大學工程嘅撥款一齊傾，盡快喺本周三工務小組委員會前傾掂數。佢又話啲議員互相鬥爭，最後咪害咗主席，即係佢！佢話咁搞法花咗時間開會又一事無成，市民咪受害囉！

我哋亦問過身兼工務小組委員會主席嘅盧偉國，佢話無收到政府話要改動議程或者臨時抽起理大圖書館擴建同翻新工程議案嘅訊息。咁有冇聽聞建制派可能反對呢個項目，同埋建制派有冇同佢傾過？佢就話冇聽到咁嘅意見，亦都冇傾過。