政情：講到社會好似太平盛世 馬逢國當面怒轟劉江華
反修例嘅示威浪潮已爆發近五個月，仍然未見有停止迹象，對唔同行業嘅影響逐漸出現。立法會體育、演藝、文化及出版界議員馬逢國曾為業界大搞問卷調查，尋日更把握機會當面省民政事務局局長劉江華，實行要為業界出氣。
立法會民政事務委員會尋日舉行會議，劉江華到立法會為上月發表嘅施政報告作簡介。馬逢國話聽完劉江華簡介，同埋睇埋劉嘅發言全文後都唔識評價，事關講到好似社會風平浪靜、太平盛世，但呢份施政報告喺好大嘅社會風浪中草擬，大彈民政事務局嘅表現就好似無懼驚濤駭浪同風吹雨打，仍然穩坐釣魚船，儼如咩都無發生咁囉。
指好多藝團音樂會需改期或延期
馬逢國續指好多藝團、演唱會、音樂會等被迫改期或延期，又有幾十台大戲取消咗，唔少粵劇老倌同從業員得番四成收入。佢唔單止為業界發聲，亦提到社會仲有好多行業同範疇政府要着手處理，偏偏劉江華一隻字都無提到，搞到佢都唔知問得邊樣好。睇嚟馬逢國今次真係好大火氣喇！