中環出更：梁高美懿獲傑出專業女性獎
由香港女工商及專業人員聯會舉辦嘅「2011年傑出專業女性及女企業家選舉」，尋晚喺金鐘萬豪酒店舉行頒獎禮，共有六位美麗與智慧兼備嘅女士獲得殊榮。獲得「傑出專業女性大獎」嘅恒生銀行副董事長兼行政總裁梁高美懿，獲老公及兩個囡囡現身打氣，另一位得獎者詠藜園董事長王小玲亦獲各方好友到賀，難怪兩人成晚愈忙愈開心，心情靚絕。
王小玲奪女企業家獎
梁太話自己有多重身份，既係銀行高層，同時又係媽咪及太太，要同時兼顧唔係件容易嘅事，所以佢今日有機會做恒生女大班，真係要多謝屋企人嘅支持。至於城中名人粉絲愛好嘅詠藜園，呢盤生意喺王小玲手上搞得有聲有色，甚至揚威海外，佢獲得「傑出女企業家大獎」確係實至名歸。
是夜係女人嘅世界，男人只能夠做陪襯。擔任評審團成員嘅香港總商會主席胡定旭，尋晚都現身沾下喜氣。
卓妮問佢係咪斟緊前高官袁莎妮（Shirley）做總商會行政總裁，佢好似有口難言，但又話仲有好多程序要行，咁即係默認？