政情：蔣麗芸四字詞攻勢鬧爆范國威

立法會公務員及資助機構員工事務委員會尋日開會，近期出現多宗同公務員有關嘅新聞，所以甫一開會就火花四濺，全因為現時政治氣氛咁緊張，蔣麗芸同其黨友都希望未來可以傾吓立法禁止侮辱公職人員罪囉，呢個議題自然令到會議室氣溫急升喇！

泛民議員林卓廷就表明唔贊成，因為現時出現唔少警隊同市民嘅衝突，而警隊已有足夠法定權力，再加埋法庭嘅臨時禁制令，睇唔到點解仲要搞禁止侮辱公職人員罪，斷言做法只會令繃緊嘅社會局面火上加油。

上個立法年度擔任呢個委員會主席嘅范國威更大揭文件，話出任主席期間都收過蔣麗芸等人嘅信件，而過往佢哋所提出嘅係辱警罪，希望佢哋老老實實，唔好拉埋其他公職人員混為一談，以為警隊擴權遮遮掩掩。

斥林卓廷壓制言論 情況恐怖

從來都唔係省油燈嘅蔣麗芸就連番發炮反駁，批評林卓廷反對議員提議，係壓制其他議員嘅言論，直言情況恐怖，希望唔好再犯，又大鬧范國威是非不分，話佢哋所講嘅係所有喺前線服務市民嘅公職人員，立場非常清晰，無遮遮掩掩，認為范國威係是非不分、腦筋混沌。

范國威就批評蔣麗芸嘅言論具冒犯性，但蔣麗芸反駁，話自己所講嘅八個字係成語，只係形容詞而無冒犯，強調係事實陳述，換來范國威批評係擘大眼講大話，林卓廷都幫口話用成語並非代表唔冒犯，好似佢講蔣所屬嘅政黨民建聯罄竹難書，都肯定係冒犯性言論，要求蔣麗芸講基本邏輯先好議政。

潘兆平叫錯蔣麗芸做蔣麗萍

雙方爭持不下，要求主持會議嘅委員會副主席潘兆平作裁決，潘就話蔣麗萍已經回應咗，竟然講錯咗蔣麗芸妹妹個名，睇嚟佢對點樣處理雙方爭拗有啲緊張喇。潘之後就話問題在於雙方理解唔同，希望大家唔好再拗字眼，否則開多兩個鐘頭會議都解決唔到先收到科，而委員會主席郭偉強過咗一陣就埋到位做番主持工作，相信潘兆平可以鬆一口氣。