政情：擬800萬修葺大劇院 劉業強遭鄉紳柴台

林偉強：憂廿年後都未回本

由劉業強做主任嘅鄉議局大樓管理委員會（委員會）尋日匯報，預料三月份嘅大樓大劇院、演奏廳、會議室等出租率無一個能夠達四成，出租率最理想已經係有三成八嘅會議室，而展覽廳更加係無人問津，睇嚟出租情況十分唔理想，而大樓一月份嘅支出為四十萬元，收入更僅三十一萬多元，盤數聽落唔太好喎。

大樓所需嘅支出似乎陸續有嚟，事關劉業強話大劇院落成時嘅燈光音響系統，已經比其他場地嘅技術低，加上用咗幾年都出現老化成為租用團體嘅詬病，所以就提出向執委會借款八百萬元作工程經費嘅提案。而委員會副主任陳志榮就解釋，成功申請後會再作正式報價，目前預料只需五至六百萬元，而且維修項目中包括更換LED電子屏幕，估計完成後每年最少帶來五十萬元嘅收入，亦可以節省現時每次搞大型活動時，租用屏幕嘅十幾萬元開支。

不過，班鄉紳唔太願意使咁多錢，好似鄉議局副主席林偉強就詢問，投放大量金錢後可以換到幾多收益，擔心廿年後都未能回本，而現時嘅設備唔係唔用得，如果租金又收唔番，怕未來會搞到出現負數添。不過，佢都話尊重委員會建議，有啲錢都應該要使，同意有需要設電子屏幕，但其他項目就應審慎行事喇！

鍾偉平：不如去買磚頭仲好

荃灣鄉事委員會主席鍾偉平就話工程有需要去做，但現時計劃只係換走老化設備如同例行公事，聽落無法增收入，認為要釐清收入對象先有數得計，仲話現時將大劇院租畀大媽跳舞、小朋友搞畢業禮等帶來嘅收入有限，如果搞完一輪都係搵唔到錢，不如去買磚頭仲好喎。

另外，鄉議局特別議員、候任新田鄉事委員會主席文美桂都話，如果整完回唔到本，到老化時又再整就只會永遠負數，而錦田鄉事委員會主席鄧賀年更話，如果等幾百個月先有回報，在座起碼死咗一大半咁多，所以浪費資源嘅事就咪搞，應該開源節流、應整先整，但佢都認同要搞電子屏幕。

面對鄉紳群情洶湧，劉業強當然攞唔到八百萬元喇，呢個波又踢番畀委員會，再作研究以及諗多幾個方案去畀鄉紳選擇，唔知下次又過唔過到關呢？