中環出更：要親身教仔女 吳鄭慧賢：狠心就會乖
每個父母都有教小朋友嘅獨特方式，已經生咗五名仔女嘅仁愛堂總理吳鄭慧賢（慧慧），早前同丈夫吳志龍帶埋兩個仔現身馬場仁愛堂盃，講起點樣湊五個年幼仔女，慧慧就話，兩公婆都比較嚴格，小朋友唔食飯，佢哋就會收起飯餸，小朋友知道冇得食，下次就會乖乖地坐喺度食。佢仲話，教小朋友最緊要自己教，要狠心就會乖咁話。
慧慧又話，五個子女之中，除咗大仔之外，仲有孖仔同孖女，其中一個孖仔似大仔，兩個孖女就各自似一個孖仔哥哥，最得意係哥哥會幫手湊番同自己似樣嗰個。慧慧話，爸爸媽媽都有遺傳孖胎嘅基因，所以佢生咗兩胎孖胎，剛出世時，同老公一人抱一個，喊聲係雙倍，真係好崩潰。
周玟秀融入澳籍丈夫文化
總理許友堅同太太鄭凱琳都有出席，佢哋都有一對孖女同一個仔。鄭凱琳曾經喺日本讀咗八年書，所以佗緊細仔時曾經去北海道住兩、三個月，諗起嗰段日子，許友堅都大讚當地天氣好、食物又好。鄭凱琳又話，原本細仔預產期同孖女生日同一日，但係佢擔心細仔出世時個個都去探BB，會搞到孖女冇咗個生日，所以特別揀遲一日才生。
總理周玟秀（Linda）都帶埋澳洲籍丈夫Alexander一齊現身，Linda話，兩人已經結婚十六年，當年帶男友見家人時，原本屋企人有啲傳統，覺得佢應該同華人結婚，後來家人覺得佢心地好、夠靚仔，又認同香港已係國際社會，所以就接受咗。Linda又話，自己見老公嘅澳洲家人時，佢哋會好似外國人咁時常攬抱，自己開初都唔習慣，不過後來仲帶咗呢個文化返屋企添！
卓妮