政情：事事托手㬹當人冇到 工記質疑商經局大細超

爭取導遊保險事宜被拒

話說上月中立法會人事編制小組委員會開會，審議商經局轄下旅遊事務署一個開位建議，該職位係負責旅監局成立及旅遊業新規管制度嘅籌備工作。工記一直都爭取要將旅行社需為前線導遊及領隊購買保險列於有關指引，但當局就拒絕，更聲稱係有工會叫價太高。當日會議，工記勞工界議員何啟明都有追問與會嘅商經局副局長陳百里，但陳都係未能承諾。及至會議就開位建議表決，工記就冇議員現身投票喇，好彩最後有關建議都獲得通過未有甩轆，稍後可提交至財務委員會審議。

有工記中人透露，當日會議之後，商經局就聲稱大家可以再坐低傾吓嘅，仲打埋電話畀身兼行政會議成員嘅工記資深立法會議員黃國健添，點知過咗成個月都一直冇回音，好似不了了之咁。該消息人士又話，其實工記同當局都唔係第一次有過節o架喇，話說工記前立法會議員陳婉嫻曾向當局建議喺大磡村設立一個電影資料館九龍東分館，最後都係被拒收場，話本港已經有一個電影資料館。

消息人士直言同當局關係認真麻麻，質疑當局係咪睇唔起佢哋喺立法會只有五票，唔志在咁話，揚言當局日後再將有關香港電台、啟德發展區等項目及撥款提交至立法會時，工記都要考慮吓係咪支持。講開又講，民建聯（民記）進出口界立法會議員黃定光牽頭搞嘅新田購物城「拍晒烏蠅」，有民記同工記背景嘅陳百里都有幫手提出過救亡措施，建議旅行團入境後可去購物城食飯，唔通民記議席多係會優先關注？難怪工記質疑佢大細超喇。

商經局：雙方關係維持到

陳百里回應話，不存在唔睬工記或不重視工記意見，強調工記五票好重要，佢成日都有上立法會十樓搵工記議員，覺得雙方關係維持到。陳仲話，其實唔止導遊保險事宜，連電影資料館一事，當局亦安排好高級嘅同事與工記商討，但唔係包生仔囉！同各黨派溝通、打好關係係問責官員嘅責任，如果凡事都交代清楚，咪唔使大家搞到咁勞氣囉。