中環出更：與區議員茶敍 鄭若驊收「法律之恥」標語
律政司司長鄭若驊「放生黎智英，唔告梁振英」惹來社會各界炮轟，甚至批評佢令本港法治淪亡。鄭尋日出席中西區區議會舉行嘅茶敍，有區議員就當佢面遞上寫有「鄭若驊法律之恥」嘅標語。雖然鄭都有接受並同議員合照，但就木無表情。做司長做到過街老鼠咁被人追住嚟鬧，睇怕鄭都要搵窿捐，或者聽意見早啲辭職落台好過喇。
吳兆康大鬧處理UGL案不當
身兼中西區議員嘅立法會議員許智峯（峯鴿）就喺社交網站貼出茶敍時鄭若驊接受標語嘅照片。峯鴿話，區議員吳兆康係茶敍中首位發言，吳一開口就大鬧鄭處理前特首梁振英的UGL案不當，令其民望低迷，但發言就當場被區議會主席葉永成打斷，話唔應該侮辱官員。結果一個茶敍就因鄭而演變成罵戰。最後葉決定結束茶敍，成個過程只係十五分鐘。
峯鴿鬧爆鄭若驊上任以來種種事件，令香港法治大倒退，市民對法制失去信心，故批評鄭係「法律之恥」絕不為過，仲話如果連批評都容不下，根本冇資格出任官員咁話。
卓妮