on.cc東網火熱放送 超級星期六晏晝睇到夜晚
「中銀人壽香港超級聯賽」今日有兩場直播好戲，頭場下午2時30分假香港仔運動場爆發榜首大戰，由聯賽「2哥」冠忠南區硬撼榜首富力R&F；尾場晚上8時在將軍澳運動場開打，由殺入菁英盃4強的理文，火併剛於周中作客北韓出戰亞協盃附加賽的和富大埔。為響應婦女節，今輪港超賽事將舉辦「Shero感謝周」，首200名入場女士每人可換領1張免費門票，球迷入到場一定要入場，未能入場都可以透過on.cc東網，觀看賽事直播！（on.cc東網周六下午2時30分、晚上8時直播）
冠忠南區硬撼富力R&F有你無我！
賽前於聯賽榜僅以2分落後富力R&F排次席的冠忠南區，是役假若贏波便能超越對方登上榜首，主教練「Ricky Sir」鄭兆聰表示，球隊取得3連捷後信心大增，他說︰「始終贏波對士氣同信心都有幫助，我哋喺主場都覺得好舒服，呢場波亦準備就緒，同時知道天氣上可能有變數，會提醒球員臨場應該點應付。」
冠忠南區目前除有陳文輝養傷外，其餘球員均有參與操練，至於上仗出戰菁英盃大演帽子戲法的高美斯，據稱比賽狀態尚未完全回復，「Ricky Sir」強調該隊陣容接近完整，乃今季爭標關鍵︰「我都有同球員講，其實球隊今季班底、後備力量都好足夠，其中史必都練番波，我話畀佢知，去到季尾我唔會淨係用嗰11個球員，如果後備席無論換邊個上場，隊波都可以踢得順，呢樣嘢對我哋嚟講都好重要！」
楊正光：6分波搏到盡
目前高踞榜首的富力R&F，上仗於菁英盃以3比1擊敗和富大埔，惟賽後因對賽成績不及夢想FC未能進身4強，主教練楊正光表示對多名出戰該盃賽的副選球員表現感滿意︰「喺菁英盃小組都有啲喜出望外嘅感覺，尤其我哋比較多少踢嘅球員落場，球隊係有好大嘅輪換，有2勝1和1負成績已經非常滿意。我哋需要每一位球員都有唔同嘅崗位同責任，就算佢哋少踢都保持到狀態，一有機會嘅時候亦把握到，呢個團隊精神好重要。」
「光Sir」又指出，期望一眾主力能以最佳狀態爭勝︰「對於爭標嚟講，呢場『6分波』非常重要，所以球隊喺菁英盃冇派主力上陣，希望佢哋有充足時間休息同準備，期望對住南區有好嘅發揮。」富力傷兵林志堅經隊醫診治和訓練後，情況已大為好轉，可望於今仗候命。
和富大埔要3分？問過理文先！
是役擁主場之利的理文，上仗於菁英盃分組賽擊敗傑志，取得4強席位，主教練陳曉明指該仗球員回防速度快，3比2致勝一球更是球員逼搶所得，勝利有助釋放壓力。今仗回歸聯賽戰線，適逢對手有亞協盃附加賽顧慮，「陳Sir」認為：「對手喺咁近嘅日子打幾場波，球員舟車勞頓、體力恢復會有影響。我哋唔知對手會出邊啲球員，所以我哋最緊要係做好自己，希望上場贏傑志嘅好表現可以維持！」
陳曉明：最緊要做好自己
雙方首循環對壘時，理文雖以1比2不敵對手，惟球隊在該仗控球時間、傳球次數及成功率都較對手多，表現絕不亞於「綠戰士」。「陳Sir」表示該仗球隊還未有新外援，球員雖然表現好，無奈因犯錯導致失球，期望今場交手能有好表現之餘，更能全取贏波3分。雙方在冬季轉會窗都有引進新球員，「陳Sir」點名必須小心利馬和辛祖，另球隊續有門將袁皓俊及前鋒史提芬彭利拿因傷倦勤。
剛於周三出戰亞協盃附加賽首回合的和富大埔，作客北韓與黎明SC打成0比0，周四晚隨即從北京轉機抵港，昨午馬上復操備戰今仗。主教練李志堅認為球隊在適應北韓對手及環境方面，已比想像中好，惟未能把握入球機會是美中不足︰「睇得出對手喺主場好想贏波，真係全場跑足。突然間要適應一支行軍迅速嘅球隊，我好開心我哋做到，我哋喺比賽初段係有機會，不過把握唔到，對手亦有唔少機會，當中有1球係比較入肉，反而佢哋喺外圍嘅控球權比較多，所以球隊最終都算係守得唔錯。」
「堅Sir」亦指，希望盡量排出最強陣容作客將軍澳︰「一定會有一啲調動，但依家聯賽形勢咁緊張，希望有能力去做到調配，喺人腳實力上取個平衡。球隊返到嚟香港得1日都要練波，因為始終有部分球員冇參與亞協，寧願賽前辛苦少少去準備好聯賽場波，等到賽後放假休息1日，再去準備嚟緊嘅次回合。」