政情：民政局西九留位甩轆 趕死線急補鑊

西九文化區嘅工程一向立立亂，又超支又延期，情況令人擔心。民政局當日就申請保留三個職位，包括一個首席政府工程師、一個首長級丙級政務官，同一個土木工程拓展署嘅總工程師，以繼續監察西九文化區計劃，任期由四月一日起。謝凌潔貞當日都話，難以百分百擔保唔會出現工程問題，但冇咗呢幾個位就絕對難作監察，點知甩轆唔夠票，建制泛民都跌晒眼鏡。

擬3月會議打尖

「死線」在即，上周五通過唔到，又遇着三月上半個月，不少議員會離港北上開會，立法會冇乜會開，下次人事編制小組委員會開會已經係三月二十二日。葉劉透露，有關保留職位嘅建議被否決後，謝凌潔貞已經急急聯絡佢，希望三月嘅會議可以加插有關議程，傾多次。葉劉就話，要同秘書處研究可唔可以打尖，不過，有關發展局兩個常額職位嘅議程已經開始咗，最少都要傾完呢個議程先，而且都要睇吓其他政策局會否反對民政事務局打尖。

睇番時間表，就算呢個議程真係成功打尖，都唔一定順風順水。三月下旬，人事編制小組委員會有三個會議，但全部都撞咗其他委員會，如果民政事務局冇做好拉票工作，隨時重蹈覆轍，就算過咗人事編制小組委員會，都仲要過埋財務委員會才能正式攞到錢，係咪可以極速通過兩個委員會，真係冇人知嘞！

多名議員都反映，其實保留呢三個西九職位，根本夠票，部分泛民都話無意阻撓，只係民政事務局太大意，先搞到投票嗰刻甩轆，既然問責官員係做政治工作，政治助理黎穎瑜以至副局長陳積志都應該上心啲，幫手箍吓票啦，否則咁高人工搵佢哋返嚟做咩呀？