政情：「獨角獸」失寵 洪為民：斑馬當道
傳說中嘅獨角獸數量稀少，且其存在嘅地方亦唔會有其他動物出現。過去幾年，財經界以「獨角獸」嚟形容短時間脫穎而出嘅創科企業，不過近年獨角獸嘅光環似乎有失色嘅趨勢。香港菁英會榮譽主席洪為民就話，目前歐美有一種新思潮，覺得未來嘅經濟發展模式，唔應該再依賴獨角獸，反而應倣效斑馬，先至係可持續發展之道。
新經濟同舊產業互相依託
洪為民解釋，斑馬係群居嘅動物，且身上嘅黑白斑紋，代表新經濟同舊產業互相依託，同獨角獸企業「一獸功成萬骨枯」形成強烈對比。佢又話，新經濟並唔係要顛覆舊產業，繼而取而代之，而應該係由新技術推動傳統產業升級轉型。大家共存共榮，先至係未來嘅出路咁話。