中環出更：脂肪化善款 陳映彤兩月減十磅
最近唔少城中名人都的起心肝減肥，同樣係減肥，仁愛堂總理陳映彤（Anna）就減得好開心，因為可以將脂肪化為善款。事緣仁愛堂總理饒亮賢知道佢想減磅，於是就出絕招，話Anna每減一磅佢就捐一萬蚊畀仁愛堂，結果短短兩個月Anna就減咗十磅，話咁易籌到十萬蚊善款。
仁愛堂早前舉行新春晚宴，好多董事局成員及嘉賓齊齊出席。卓妮見Anna成個人瘦晒，傾開原來有笑料。饒亮賢就笑笑口話，覺得Anna天生麗質，既然佢話想減肥，所以就用呢種方法去鼓勵佢，結果成效好好。Anna就嘴甜話多謝饒總支持喎！
吳克儉周圍旅行取經
出席晚宴嘅仲有香港科技大學校長史維、台北經濟文化辦事處代理處長高銘村及教育局前局長吳克儉等人。史維同仁愛堂主席羅台秦（Louisa）都係台灣人，佢話對Louisa上任後十分注重向社區提供精神健康支援嘅做法深感認同，尤其係依家年輕人面對各種唔同嘅衝突及壓力，需要各界給予更多支持。若有機會，科大可以同仁愛堂合作，以便令社會有更陽光及樂觀嘅氣氛。
喺教育局局長任內好鍾意去旅行嘅吳克儉就繼續周圍去旅行，近半年去過新加坡、日本北海道、馬來西亞檳城及內地多個城市。問佢點解咁喜歡旅行？佢笑笑口話，旅行可以學到唔少嘢。佢依家喺中山一個航天農業基地幫手，早前去新加坡睇到一個專門賣沙嗲嘅露天美食廣場，好有特色，佢得到啟發，覺得都可以偷師喺航天農業基地搞一個主打中山名菜嘅藥膳餐飲場所，佢仲強調係中山名菜，唔係「中森明菜」喎，真係搞笑！
卓妮