特區政府大事做不了，小事做不好，是以常被揶揄「冇心冇肺」，甚至被斥為冇神經、冇靈魂。旁觀者清，其實真係冇冤枉佢o架！大家有目共睹，被稱為「罪惡城」嘅深水埗通州街天橋底「南亞村」，早前被揭發是槍械庫後，日前又發生縱火事件。南亞村已成為「市區炸彈」，早排食環署及民政署在警方協助下，敲鑼打鼓、係威係勢咁近五十人殺入南亞村，卻只清拆了一間木板屋咁大把，做騷做成咁實在丟人現眼！
講開又講，政府大事做不了，小事又如何？好似噪音擾攘了十八年嘅旺角西洋菜南街行人專用區，幾經研究、諮詢終於通過「殺街」，當地居民終於有覺好瞓，而周邊商舖亦樂得耳根清淨。之不過，殺街一周後，問題便陸續浮現。
政府趕絕街頭表演者及大媽歌舞團，佢哋惟有四散至尖沙咀碼頭、銅鑼灣行人專用區等地搵食，繼續唱懷舊金曲、載歌載舞，聲浪難免過大，搞到尖沙咀碼頭一帶嘅商戶大嘆「頂唔順」，九巴車長休息室亦受到滋擾，有車長更表示，啲人企晒出路面，影響上落客。此外，又多了一批「掌相命理」攤檔，大家為咗搵食，難免因為「霸位」而發生爭執，總之遲早會出事！有區議員指出，自從該區多了街頭表演者，投訴隨之激增。
政府殺街容易，殺完卻無善後，唔通佢哋冇諗過街頭表演者會轉戰其他地方？當然有，不過冇神經政府做事向來頭痛醫頭、腳痛醫腳，永遠留下手尾。其實早就有論者指出，殺街趕絕街頭表演者，斷人衣食猶如殺人父母，政府應該發牌規管，劃出指定地點畀有水準嘅街頭表演者「樂其樂」。可惜港產官僚全是「佛系」信徒，以為船到橋頭自然直，街頭表演者去到其他地區自然會有所收斂，可惜佢哋嘅聲浪依然造成極大滋擾，你話政府係咪戇居？