究竟魅力過人嘅女神係點樣煉成呢？有男士認為煉成過程好簡單，就係多啲做美容及勤做運動，自然樣靚又好身材。不過南韓模特兒吳雅琳就話畀大家知，男士咁諗未免太過膚淺，皆因佢之所以能夠輕易吸引到大家嘅目光，皆因佢嘅魅力係從心而發。
從心而發呢四個字無可否認有啲空泛，但係當大家睇過吳雅琳嘅寫真後，便會發現佢有種愈睇愈吸引嘅感覺。呢位喺南韓首爾出生，身高175cm嘅模特兒，雖然氣質如此動人，但係最初未諗過以模特兒作為自己嘅事業，佢一直希望當空姐，除咗學習外語，更學習跳舞練出好身段。有次喺禮儀訓練班中，佢結識到一位從事攝影模特兒工作嘅朋友，對方表示佢外形吸引，如果加入模特兒界會有相當唔錯嘅發展。呢句說話引起咗佢對模特兒工作嘅興趣，於是朋友就帶佢去模特兒事務所面試，負責人大讚雅琳氣質動人，非常有潛質，經過考慮之後，佢先兼職做模特兒，試吓自己係咪真係適合喺呢行發展，而佢第一個工作竟然係以賽車女郎身份登場。
雅琳表示，當時事務所問佢夠唔夠膽喺賽場上亮相，因為佢未有過喺大型活動上演出經驗，擔心佢應付唔嚟，性格硬朗嘅雅琳覺得呢個工作並唔難，加上佢接受過模特兒訓練，於是便答應，點知佢一上到場便被墟冚嘅場面嚇親，好彩有前輩幫忙才得以順利過關，而經過呢次演出之後，令佢提升唔少自信心。
事實上，身材高挑嘅雅琳一直自信心不足，雖然平日表現得相當硬朗，卻經常喺重要關頭甩轆，而喺呢次大型活動能夠演出成功，對佢嚟講絕對係打咗支強心針，自此之後，佢便頻頻喺各個賽事上以性感賽車女郎造型登場。可能有人會覺得相對唔少胸前偉大嘅賽車女郎嚟講，佢對車頭燈嘅分量未免細咗啲，不過呢樣並唔重要，皆因佢甜美嘅樣貌，配合勻稱嘅身材以及一對修長美腿，外形一啲都唔輸蝕，最重要係佢散發出一股溫柔氣質，每次登場都能輕易成為大家嘅焦點。隨住佢嘅演出經驗愈嚟愈豐富，人氣亦漸漸提升，有見及此，事務所便安排佢做車模，先後喺首爾同釜山等多個國際車展上亮相，而造型優雅嘅佢散發出濃濃嘅女人味。
及後佢嘅工作機會愈嚟愈多，而且唔再局限喺南韓舉辦嘅車展，喺杜拜、法國、德國等多個大型車展都會見到佢嘅蹤影，為多個汽車及汽車零件品牌擔任車模及展銷女郎，同時亦開始為手機遊戲、電子產品及化妝品拍攝平面廣告。工作量大增，有人問佢會唔會因為壓力大而應付唔嚟，雅琳坦言雖然有壓力，但仍然可以應付得到，最重要係希望得到大家認同，呢點先至最為重要。
簡介：吳雅琳身材勻稱，擁有一對修長美腿，不過佢甚少以性感造型示人，佢認為作為一位模特兒，最重要係無時無刻展現個人魅力，反而唔鍾意露肉作為誘人手段。如果大家想了解佢多啲嘅話，就要Click入呢個網站喇！
出生地：首爾
身高：175cm
三圍：34-25-36
網址：http://cafe.daum.net/AngelArim
撰文：魂