「服務差過廉航」，這是老朽很早之前便發出的感嘆。唔使問阿貴，講緊嘅係於全球最佳航空公司排名榜節節下滑嘅國泰航空！一間公司衰開有條路，國泰嘅排名已連跌四年，由去年嘅第五位跌至今年嘅第六位。其實服務質素有如逆水行舟，不進則退，人家不斷改善，自己即使原地踏步，都係退步緊，國泰原本嘅第五位畀長榮航空取代，卻仍然不思進取，服務每況愈下，真係睇見都眼冤。
近排國泰衰嘢不斷，都係涉及罔顧服務質素。呢，今年四月開始，國泰陸續為其波音客機的經濟艙增加座位，將原來每行九個座位改為十個，新改動令本來十八點五吋闊的座位減至十七吋，乘客慘變沙甸魚。空中服務員也叫苦連天，皆因座位加而人手不變，搞到派餐時間大增，而行李存放空間不足，令航班更容易延誤。總而言之，國泰為求賺盡而罔顧服務質素，長此下去，睇怕服務點止差過廉航咁簡單！
國泰不以客為尊，可以說是破壞了規矩和禮數，今時今日咁嘅服務態度，梗係唔掂喇！有上月二十八日乘國泰航班從東京回港嘅市民投訴，話佢在網上預辦登機時，明明和女兒獲配相連座位，丈夫則坐後一行，但到機場才被告知原位的娛樂系統故障，故將她與女兒調後十行，丈夫就坐原位。更離譜嘅係，她登機後發現原位有其他乘客坐着，且娛樂系統運作正常。看官，換了是你，你話嬲唔嬲先？點解要講大話？點解連尊重客人嘅基本禮貌都冇？正如苦主話齋：「國泰鍾意調就調，咁預辦登機有咩作用？」見微知著，這是關乎一個企業的誠信，如果連這根本的服務態度也沒有，其排名又怎會不跌個四腳朝天？
國泰航空，為何愈做愈燶？不就是欠缺自省的謙恭，一味自以為是，加上經常被投訴無道歉、無賠償、服務差等，其「有口皆悲」積少成多，乘客又點會有信心選搭國泰？