政情：公民講場：鉛禍補完又爆鑊房署水署難甩身

繼三年前葵聯邨爆出鉛水事件後，新落成嘅葵翠邨近日亦驚爆鉛水超標，有八個單位嘅水樣本經化驗後，結果發現部分嘅含鉛量超出世衞標準九倍，有居民覺得好驚，鬧爆政府冇吸取教訓。老實講，上次爆出鉛水事件，房屋署同水務署事後補鑊訂出好多規管措施，點解三年後又再鉛水為禍呢？房屋署署長應耀康當時已坐緊呢個位，接手做水務署署長嘅黃仲良，擺明以為事件丟淡咗，又再疏於監管，依家重蹈覆轍，置市民嘅食水安全於不顧，今次佢哋咪使旨意過到骨。