消委會尋日公布新一輪檢測，喺部分校服驗出有害芳香胺、甲醛以及酸鹼值偏高，其中有害嘅芳香胺仲會致癌添！唔止校服，連蜜糖都出事，有部分蜂蜜同埋麥蘆卡蜂蜜驗出攙雜糖分，而且仲要係外來物質，同埋餵飼用嘅糖漿。搞到致癌咁大件事，但包括食物及衞生局局長陳肇始在內嘅政府部門似乎冇乜反應咁。講開又講，今次消委會係分別按內地同埋國際標準去做測試，或者用好低要求嘅香港標準。香港話晒係國際大都會，但係咁多年嚟都冇自己嘅一套標準為市民把關，唔通叫大家自生自滅？
