模特兒予人印象都係冷冰冰，咁先至可以展現出型格嘅一面，對於朴世雅嚟講就最深明呢個道理。不過隨住社會風氣嘅變化，想展現型格並非單憑Cool爆嘅表情就得，而世雅綜合多年演出經驗同心得，便開創出自己獨有一套嘅風格，而且大受歡迎。
唔少南韓模特兒嘅出道經歷，總係離唔開經朋友介紹先做兼職模特兒，之後因為各種原因而轉做職業模特兒，開始佢哋嘅模特兒事業。然而朴世雅嘅出道經歷相當簡單，佢自細夢想成為模特兒，於是就自薦入行。佢解釋之所以夢想做Model，係因為受到一位從事模特兒工作嘅親戚影響，佢覺得嗰位親戚姐姐好靚，冷艷嘅外形更係相當有型。不過當屋企人知道佢有呢個夢想時，卻紛紛表示反對，原因係佢年紀尚輕，應該專注學業。雖然係咁，世雅心底裏仍未放棄夢想，及至大學時期，終於有機會可以自立生活，當時佢第一件事就係去事務所自薦做模特兒，憑住冷艷嘅外形、高挑及玲瓏浮凸嘅身材，獲得事務所嘅賞識，從此佢開始兼職攝影模特兒工作，而佢第一份工作就係為雜誌拍攝內頁寫真，青春又冷艷嘅形象令佢打響名堂，幾個月後，事務所便安排佢參與一個大型車展活動，佢表示由於冇乜經驗，故此當日嘅表現麻麻，幸好獲得事務所體諒，認為佢只要多啲參與大型活動嘅演出，便能有更好嘅表現。
自嗰次車展後，世雅頻頻以車模身份喺釜山同首爾多個車展上登場，隨住經驗累積，不但表現得愈嚟愈成熟，經過一年多嘅兼職生涯後，佢決定轉為職業模特兒，之後佢嘅演出機會更多，更化身成性感賽車女郎，展現火辣嘅魔鬼級身材，配合冷艷Cool爆外形，成為賽場上嘅焦點。人氣愈嚟愈高嘅世雅，不但工作排得密密麻麻，更被封為冷艷女神。正當佢嘅人氣愈嚟愈高之際，卻突然間所有工作停頓落嚟，事務所解釋，雖然佢憑冷艷兼火辣嘅形象獲得極高人氣，但隨住社會風氣嘅變化，唔少廠商都希望搵個熱情又親民嘅模特兒參與演出，為咗令模特兒事業更上一層樓，於是佢保持冷艷形象，並加入熱情魅力，卻又不失型格嘅風格。驟眼睇落去，好似好空泛，其實世雅早就已經有晒計劃，就係去修讀演技課程，經過半年進修後，佢予人耳目一新嘅感覺，既具有型格，同時又能展現出冷艷與熱情嘅氣質。工作重新變得頻密嘅佢，人氣亦逐漸攀升，呢個時候有人問佢，有冇興趣轉到演藝界發展，不過佢表示由始至終都覺得惟有模特兒工作，令佢最有滿足感。對於未來嘅發展，佢希望能夠有更多及更大嘅發揮空間，讓自己嘅事業有更好嘅發展。
簡介：朴世雅最令人印象深刻嘅地方，除咗型格嘅外形及氣質外，相信非火辣身材莫屬，不過除非係攝影師要求，或者係工作需要，否則佢唔會刻意性感露肉，佢表示作為一位模特兒，最重要係令大家記得自己嘅形象，反而身材唔係最重要。如果大家想了解阿妹多啲，就要Click入呢個網站喇！
網址：http://cafe.daum.net/tptp7
出生地：首爾
身高：170cm
三圍：34-25-35
撰文：魂