政情：陳家珮做電車女 有位泊冇電叉
香港地上樓難，連搵個泊車位都難，如果係揸電動車就難上加難，皆因隨時有位都冇電叉！新民黨嘅南區區議員陳家珮（Judy）同該黨青年委員會主席王政芝（Gigi），兩位靚媽最近約埋做「電車女」，一齊去搵電動車充電位，唔好以為靚媽手車未必得，見Gigi揸住架車喺停車場中間左穿右插，有姿勢有實際（口架）！
同王政芝兜足兩個停車場
兩位靚媽率先去港灣道會展停車場，因為指引不足兜咗陣先搵到全場僅有嘅三個充電位，可惜已經泊滿車。佢哋又轉場到大會堂停車場，尋尋覓覓終於見到一個靠柱嘅停車位，雖然有啲窄，都好過冇得泊。點知Gigi泊好車後，發現隔籬車位嘅充電器壞咗，泊喺隔籬嗰架車就用緊佢哋車位嘅充電器，只好宣告行動失敗！